امراء دار العلوم

امیر سوم مولانا پروفیسر محمد حسان خان صاحب

آپ کی پیدائش ۱۹۵۲ء میں بھوپال میں ہوئی آپ مولانا مرحوم کے سب سے چھوٹے بیٹے ہیں، آپ کی ابتدائی تعلیم دار العلوم تاج المساجد میں ہی ہوئی، ۱۹۶۸ء میں میٹرک پاس کیا، اس کے بعد اعلیٰ تعلیم کے لئے لیبیا کے شہر بنغازی چلے گئے اور وہاں کی اسلامیہ یونیورسٹی سے لیسانس (بی۔اے) کی ڈگری ۱۹۷۲ءمیں حاصل کی پھر بھوپال کی برکت اللہ یونیورسٹی سے ایم۔ اے اور پی۔ ایچ۔ ڈی کی ڈگریاں حاصل کیں۔

آپ نے لیبیا سے فراغت کے بعد دار العلوم تاج المساجد بھوپال میں چار سال ۱۹۷۳ءسے۱۹۷۶ء تک اعزازی تدریسی خدمات انجام دیں۔

سات اپریل ۱۹۸۰ء میں برکت اللہ یونیورسٹی کے شعبۂ عربی میں لیکچرارمقررہوئے پھر ترقی کےمنازل طے کرتے ہوئے ریڈر، پروفیسر، ہیڈآف دی ڈپارٹمنٹ اورڈین کے عہدوں کو زینت بخشی ،شعبۂ عربی کو اپنی محنت سے بام عروج پر پہنچایا، ۲۰۱۷ء تک ڈین کے عہدے پر رہتے ہوئے ریٹایر ہوئے ۔

آپ نے متعدد ممالک کے سفر کئے ملک وبیرون ملک کی اہم کانفرنسوں میں مسلسل شرکت کی ابھی تک آپ کی اہم موضوعات پر ۱۸ کتابیں منظر عام پر آچکیں ہیں، مختلف کمیٹیوں اور اداروں کے آپ معزز ممبر ہیں، آپ کو عربی زبان کی خدمات کے اعتراف کے طور پر ۲۰۱۵ء میں صدر جمہوریہ ایوارڈ تفویض کیا گیا۔

لیبیا کی تعلیم سے فراغت کے بعد آپ کو لیبیا میں ہی بہت اچھی ملازمت مل رہی تھی کئی اور عمدہ اداروں میں بہترین مواقع آپ کو میسر تھے لیکن آپ بھوپال میں ہی مقیم رہے اور والدین کی خدمت کرنے کو سعادت سمجھتے رہے، اس طرح آپ کو مولانا مرحوم کے ساتھ رہنے اور ان کے کام کرنے کے طریقہ کو بہت قریب سے دیکھنے اور سمجھنے کا خوب موقع ملا، ۱۹۸۲ء میں آپ کو دار العلوم تاج المساجد کی شوری کا ممبر نامزد کیا گیا، مولانا کی وفات کے بعد جب منظور سروش صاحب امیر دار العلوم منتخب ہوئے تو آپ کو اسی وقت ۱۹۸۶ء میں نائب امیر مقرر کیا گیا اور تقریبا ۹ سال آپ نائب امیر کے عہدہ پر ۱۹۹۵ء تک قائم رہے، ۱۹۹۵ء میں ضعیفی کی وجہ سے منظور سروش صاحب نے استعفی دے دیا جس کے بعد آپ کو امیر دار العلوم مقرر کیا گیا چار سال بعد ۱۹۹۹ء میں کچھ ناخوشگوار وجوہات کی بنا پر آپ نے امارت دار العلوم سے استعفی دے دیا۔

: آپ کی امارت کے چار سالہ دور میں چند اہم مندرجہ ذیل کام ہوئے

سید صاحب کے نام سے موسوم ہال میں لائبریری کی منتقلی، مسجد کی خستہ حال چھت کا انتظام اور مرمت، احاطۂ دار العلوم کی گھیرا بندی، سابق ڈی۔پی۔آئی کی آراضی کا حصول اور دار العلوم کے احاطوں سے مختلف قبضوں کا انخلاء۔

اس کے علاوہ آپ کا چار سالہ دور امارت ممبران شوری کی میٹنگوں اور مجلس امارت کے جلسوں کی کثرت کے لئے بھی مشہور رہا۔

سال ۲۰۲۰ء میں سابق امیر دار العلوم حافظ سراج الحسن صاحب کی وفات کے بعد آپ کو متفقہ طور پر دوسری مرتبہ امیر دار العلوم منتخب کیا گیا ۔ اللہ تعالی آپ کے سایےکو دراز فرمائے اور آپ سے اپنی رضا کے اور مزید کام لے۔

امیر چہارم مولانا محمد سعید صاحب مجددیؒ متوفی ۳۰/ اپریل ۲۰۱۷ء

آپ کا تعلق مشہور خانوادہ مجددیہ سے ہے مشہور زمانہ بزرگ حضرت شاہ محمد یعقوب مجددی صاحبؒ کے آپ دوسرے صاحبزادہ ہیں، آپ ۱۹۳۳ء میں بھوپال میں پیدا ہوئے، کم عمری میں قرآن کریم حفظ کیا، زمانے کے مشہور اساتذہ سے تعلیم حاصل کی، عربی، اردو، فارسی اور انگریزی زبانوں سے آپ واقف تھے عربی اور اردو میں نثر نگاری کے ساتھ ساتھ نظم پر بھی قدرت رکھتے تھے۔

مولانا مرحومؒ آپ کے استاد تھے، حضرت صاحب ؒ سے ارادت و عقیدت مندی کی وجہ سے مولانا مرحومؒ آپ کا بہت اکرام کرتے تھے، میاں محترم کو بھی مولانا مرحومؒ سے بہت محبت وعقیدت تھی، آپ کی اتوار کی روحانی مجلسوں میں اکثر مولانا مرحومؒ کا تذکرہ آتا تھا، اکثر مولانا نے باصرار آپ سے تاج المساجد میں عیدین کی نمازیں پڑھوائی ، لمبے عرصہ تک وہاں تراویح بھی پڑھوائی ، اکتوبر ۱۹۶۱ء میں مجلس شوری کے ممبر بنائے گئے ، تاج المساجد کی کئی نمائشوں کا آپ کے ذریعہ افتتاح کرایا گیا۔

سال ۱۹۹۹ء میں آپ دار العلوم کے امیر مقرر ہوئے آپ نے دار العلوم کی امارت سنبھال کر امت کے اس اہم قومی ادارے کی بد نیتوں اور دشمنوں سے نہ صرف حفاظت کی بلکہ اس کے کام کو ترقی کی راہ پر آگے بھی بڑھایا، تعلیمی ترقی کے ساتھ ساتھ آپ کے دور امارت میں مختلف تعمیری کام بھی سر انجام دئیے گئےجس میں مطبخ سے ملحق ایک بڑی بلڈنگ غلہ اسٹور کرنے کی غرض سے تعمیر کی گئی ،میناروں کے بر آمدوں کی اصلاح اور مرمت کی گئی اسی طرح احاطہ کے شمال مغربی میدان میں ایک زبردست جدید اندا ز کی دار الاقامہ کی تعمیر کا آغاز کیا گیا جس کا سنگ بنیاد آپ کے دست اقدس سے رکھا گیا(تفصیل کے لئے تاریخ کا لنک وزٹ کریں)۔۔

اپریل ۲۰۱۷ء میں۸۳ سال کی عمر میں مختصر علالت کے بعد آپ کی وفات ہوئی۔

امیر پنجم حافظ محمدسراج الحسن صاحب مجددی متوفی ۲/ ستمبر ۲۰۲۰ء

آپ کا تعلق بھی خانوادہ مجددیہ سے ہے آپ حضرت شاہ محمدیعقوب مجددی صاحبؒ کےفرزند اور سعید میاں محترم کے چھوٹے بھائی تھےآپ۱۹۴۰ء میں بھوپال میں پیدا ہوئے ،کم عمری میں قرآن کریم حفظ کیا،آپ صاحب فہم وفراست تھے،امت کے ملی وسماجی مسائل پر بڑی نگاہ تھی ، آپ حکمت وموعظت حسنہ کے ساتھ دعوت الی اللہ اور طریقۂ اصلاح کےقائل تھے، امت کے بچوں کی تعلیم وتربیت کے لئے ہمیشہ فکرمند رہتے اور اس سلسلہ میں برابر مشورہ دیتے اور مسلک ومذہب کی پرواہ کیے بغیر ہر اصلاحی کوشش میں برابر شرکت کرتے تھے ۔

مئی ۲۰۱۷ء میں آپ دار العلوم تاج المساجد کی مجلس شوری کے ممبر منتخب ہوئے پھر ۲۳ جولائی ۲۰۱۷ء کو مجلس شوری نے آپ کو امیر منتخب کیا۔

آپ نےاپنے مختصر سے دور امارت میں تعلیمی وتعمیری کاموں کو آگے بڑھایااور دار العلوم کے تحفظ واستحکام میں اہم ذریعہ ثابت ہوئے۔

ستمبر ۲۰۲۰ء میں آپ کی وفات ہوئی ، خاندانی قبرستان واقع لال پریڈ گراونڈ میں سپرد خاک ہوئے۔

معتمد تعلیمات مولانا حبیب ریحان خاں ندوی ازہری متوفی ۸/ اگست ۲۰۰۹ء

آپ مولانا محمد عمران خاں صاحب مرحوم کے بڑے صاحبزادہ تھے، ۱۳/اگست ۱۹۳۶ء میں بھوپال میں پیدا ہوئے، ابتداء سے درجۂ تکمیل تک تعلیم دار العلوم ندوۃ العلماء میں حاصل کی جہاں اس وقت آپ کے والد ماجد مہتمم تھے، ۱۹۵۱ء میں آپ نے دار العلوم ندوۃ العلماء سے عالمیت کی سند حاصل کی پھر ۱۹۵۳ء میں فضیلت اور ۱۹۵۵ء میں درجۂ تکمیل سے فراغت حاصل کی،آپ بچپن سے ہی ذہین اور حوصلہ مند تھے، تعلیم کے ہر مرحلے میں فائق اور نمایاں رہے، آپ کی فکر پر ندوی تحریک کا بڑا اثر تھا، جو فکر و خیال اور تحریر و تقریر میں آخری عمر تک نظر آتا رہا۔

ندوۃ العلماء سے فراغت کے بعد بھوپال واپس آ گئےاور تاج المساجد کا ترجمان رسالہ “نشان منزل” کی ادارت کا کام بحسن وخوبی انجام دیا ساتھ ہی دار العلوم تاج المساجد میں اعزازی طور سے تدریسی فرائض بھی انجام دئیے، پھر اعلیٰ تعلیم کے لئے ۱۹۵۸ء میں مصر گئے جہاں جامعہ ازہر سے تخصص فی الدعوۃ والارشاد (ایم۔ اے) اور تخصص فی التدریس (ایم۔ ایڈ) کی ڈگریاں حاصل کیں پھر قاہرہ یونیورسٹی سے عربی ادب میں لیسانس (بی۔ اے آنرس)اور جدید عربی ادب میں (پی۔جی۔ ڈپلومہ) کیا۔

اعلی تعلیم سے فراغت کے بعد لیبیا کے شہر البیضاء میں۱۹۶۳ء سے۱۹۸۷ء تک جامعہ الامام محمد بن علی سنوسی میں اسلامی علوم اور عربی زبان وادب کے استاد کی حیثیت سے قریب ۲۵ سال تک تدریسی خدمات انجام دیں ۔

اپریل ۱۹۷۶ء میں دار العلوم تاج المساجد کی مجلس شوریٰ کے ممبر منتخب کئے گئے، ۱۹۸۷ء میں وطن واپس آنے کے بعد دار العلوم تاج المساجد میں معتمد تعلیمات کا عہدہ سنبھالا اور آخر حیات تک ذمہ داریاں ادا کرتے رہے ،۱۹۸۹ء سے ۱۹۹۴ء تک قائم مقام امیر دار العلوم بھی رہے۔

طالب علمی کے زمانہ سے ہی اردو و عربی زبان میں مضمون نگاری کا شوق ہوا ، نشان منزل کی ادارت نے اس میں اور نکھار پیدا کر دیا، ندوہ میں قیام اور حضرت مولانا مرحوم کے بیٹے ہونے کی وجہ سے ہندوستان کے تمام مشہور علماء اور اہل قلم کی محبتیں بھی ان کو حاصل ہوتی رہیں ذہن اخاذ ہونے اور مطالعہ کے بے پایاں شوق نے آپ کے علم کو نئی فکری بلندیاں عطا کیں ، آپ کی تحریر ہو یا تقریر جرأت وبے باکی اور علمی شان سے خالی نہیں رہیں ۔

آپ کے قلم سے ۱۱ کتابیں اور قریب ۳۰۰ سے زیادہ مقالات ملک وبیرون ملک کے مختلف رسالوں میں شائع ہو چکے ہیں ، آپ علمی کانفرنسوں اور سیمیناروں میں بڑے احترام سے بلائے جاتے کئی اداروں اور کمیٹیوں کے آپ رکن رکین تھے ان میں: بین الاقوامی کلینڈر پروگرام ملیشیا، اسلامی مرکز ڈیوزبری برطانیہ ، پرسنل لا بورڈ ،کل ہند مجلس مشاورت،فقہ اکیڈمی اور مدھیہ پردیش وقف بورڈ وغیرہ۔

سال ۲۰۰۷ء میں عربی زبان و ادب کی خدمت کے اعتراف کے طور پر صدر جمہوریہ ہند نے آپ کو سند اعزاز سے نوازا۔

دار العلوم تاج المساجد کے اساتذہ وطلبہ کے فکری ارتقاء ودار العلوم کے نصاب تعلیم میں اصلاحات کے تعلق سے آپ کا نمایاں کردار رہا۔

اگست ۲۰۰۹ء میں آپ دار فانی سے دار باقی کی طرف کوچ کر گئے۔

نائب مہتممین

مولاناسیدحشمت علی صاحبؒ نائب مہتمم متوفی ۷ جولائی ۱۹۹۴ء

مولانا سید حشمت علی صاحب مظفر نگر میں پیدا ہوئے،والد کا نام سید بشارت علی خاندانی تعلق سادات بارہا سے ہے ان کے نانا مولوی حافظ عبد العزیز صاحب شاجہاں بیگم کے زمانے میں محکمۂ مالیات میں منصرم تھے انہیں کے سایہ میں مولانا نے مدرسہ سلیمانیہ میں تعلیم حاصل کی پھر الہ آباد یونیورسٹی سے مولوی فاضل کی سند بھی حاصل کی آپ کو پیر ابو احمد سے بھی خاص تعلق تھا ۔

مولانادارالعلوم کے سب سے پہلے نائب مہتمم ہوئے اس سے پہلے آپ جامعہ احمدیہ بھوپال کے ممتاز استاذ تھے ۔ جامعہ کے ختم ہونے کے بعدمولانامحمدعمران خاں صاحب کی فکر سے متاثر ہوئے اور جب دار العلوم تاج المساجد کا قیام عمل میں آیا تو آپ مولانا مرحوم سے وابستہ ہوئے اور دار العلوم کی خدمت ایسے اخلاص سے کی جس کی مثال ملنا مشکل ہے ۔ دار العلوم کا تعلیمی نظام ہو یا تعمیرات ومرمت کا کام ہو آپ سب کے نگراں تھے آپ شب و روز دار العلوم کی خدمت کے لئے وقف ہو گئے آپ کی یہ ساری کوششیں ہمیشہ یاد رکھی جائیں گی اور یہ کہنا بیجا نہیں کہ موسس دار العلوم کے بعد سب سے زیادہ دار العلوم کی خدمت آپ ہی نے کی ہے۔

مولانا محمد نعمان خاں صاحب ندوی ؒ نائب مہتمم متوفی ۸/مئی ۱۹۹۸ء

مولانا محمد نعمان خان صاحب ندوی ۱۹۲۰ء کے آس پاس بھوپال میں پیدا ہوئے،اپنے دونوں بڑے بھائیوںمولانا محمد عمران خاں اور مولانا محمد عرفان صاحب کی طرح ندوۃ العلماء میں تعلیم حاصل کی ، اور ۱۹۳۸ء میں ندوہ سے فراغت پائی۔

کچھ عرصہ تک درجہ تکمیل میں پڑھانے کا تجربہ بھی حاصل کیا، اس کے بعد بھوپال آ گئے اور موضع منی کھیڑی میں اپنے گھر کی زمین سنبھالی،پھر تجارت بھی کی،حضرت سید سلیمان ندوی صاحب کے قیام بھوپال کے زمانے میں ان کی خدمت میں رہے اور ان سے بہت استفادہ کیا ، جب دار العلوم مسجد شکور خاں سے تاج المساجد منتقل ہو اتوان کی شکل میں ایک لائق استاد کی ضرورت پوری ہو گئی ، آپ پانچویں شخص ہیں جن کا تقرر دار العلوم میں ہوا پہلے صرف پانچ گھنٹہ پڑھانے کے لئے بعد میں پورے اوقات کے لئے مدرس بنایا گیا اور یکم فروری ۱۹۵۲ء کو آپ کتب خانہ کے منصرم بھی ہو گئے۔

مولانا محمد نعمان خان صاحب دار العلوم کے لئے غلہ فراہمی کی مہم کی جان تھے اپنی محنت اور ایمانداری سے اس کام کو بہت آگے پہنچا دیا ، چندے کی دیگر مہموں میں بھی آپ نمایاں رہے ۱۹۵۶ء میں آپ کو باقاعدہ دار العلوم کا سفیر مقرر کیاگیا۔

۱۱/اکتوبر ۱۹۷۲ء کو جب مولانا حشمت علی صاحب ملازمت سے سبکدوش ہوئے تو آپ کو قائم مقام نائب مہتمم بنایا گیا پھر یکم نومبر ۱۹۷۳ء کو آپ مکمل نائب مہتمم ہو گئے ۔ آپ کا خانقاہ مجددیہ اور تبلیغی جماعت سے خصوصی تعلق تھا، دار العلوم تاج المساجد میں جب عالمیت کا درجہ کھلا تو آپ بخاری شریف پڑھانے والے پہلے استاد ہوئے ، مولانا محمد عمران خان کی وفات کے بعد آپ کو ندوۃ العلماء کی مجلس شوریٰ کا رکن بھی بنایا گیا ۔۸/مئی ۱۹۹۸ء کو آپ نے وفات پائی ۔

مولانامحمدسلمان خاں صاحب ندویؒ نائب مہتمم متوفی ۱۷ /مئی ۱۹۹۱ء

آپ مولانامحمد عمران خاں صاحب کے چھوٹے بھائی تھے ۹/جنوری ۱۹۲۸ء کو بھوپال میں پیدا ہوئے،ابتدائی تعلیم مشہور زمانہ مدرسہ احمدیہ میں ہوئی، پھر خاندانی روایت کے مطابق اعلی تعلیم کے لئے ندوہ چلے گئےلیکن بعض گھریلو مجبوریوں اور والد محترم کی طبیعت ناساز ہونے کی وجہ سےان کو جلد ہی واپس گھر آنا پڑا، بعد میں لکھنؤ یونیورسٹی سے عالم کی سند حاصل کی ، والد کے انتقال کے بعدآپ نے ندوہ میں اپنے برادر محترم کے پاس تعلیمی ترقی کے لئے قیام کیا اور ندوہ کے بڑے اساتذہ سے استفادہ کیا۔

سن۱۹۴۳ء میں بھوپال واپس آ گئے اور اپنی خاندانی زمین کی نگرانی کرنےلگے، ساتھ ہی ریاست بھوپال کے دفتر حضور میں تعلیمی وظائف کے شعبہ سے منسلک ہوئے اور قریب ۸ سال تک اس خدمت کو انجام دیا۔

سن ۱۹۴۷ء میں جب تبلیغ کے کام نے عام مقبولیت حاصل کی تو آپ بھی اس محنت میں شامل ہوئے اور حضرت مولانا کے ساتھ اس محنت سے آخر عمر تک وابستہ رہے ۔

تیس جولائی ۱۹۵۲ء کو بھوپال سے جب پہلی جماعت حجاز کےلئے روانہ ہوئی تو آپ ہی اس کے امیر مقرر کئے گئے، یہ سفر آپ کے لئے بہت ہی مفید ثابت ہوا عربی زبان کی مہارت پیدا ہوئی ، تقریر کرنے کا سلیقہ آیا اور خود تبلیغ کے کام کو اور بہتر بنانے کے کئی راستے ان کے سامنے آئے، اسی سفر میں مختلف کانفرنسوں میں بھی شرکت کی شروع میں ترجمہ کے کام میں ضرور دقتیں سامنے آئیں لیکن بہت جلد آپ نے ان پر قابو پا لیا، حضرت مولانایوسف صاحبؒ کے معتمد خاص ہو گئے اور یہی وجہ ہے کہ بڑے بڑے اجتماعات میں اپنی موجودگی میں وہ آپ سے تقریریں کرواتے تھے۔

دار العلوم تاج المساجد میں ۲۰ مئی ۱۹۵۶ء کو آپ کی خدمات اس طرح حاصل کی گئیں کہ آپ دار الاقامہ اور مطبخ کے منتظم بنائے گئے، ۱۹۶۱ء میں ماسٹر عقیل صاحب کے ساتھ غلہ وصولی کا مشکل کام بھی بڑی خوش اسلوبی سے پورا کیا، ۱۹۶۲ء میں حضرت مولانا کے اصرار پر آپ ممبئی میں چندے کے کام کے لئے تشریف لے گئے اور بہت کامیاب رہے۔

سن ۱۹۷۱ء میں جب تاج المساجد کی تکمیل کا تاریخی کام شروع ہوا تو آپ کو نگران تعمیرات مقرر کیا گیااور آپ نے اس ذمہ داری کو جس بے مثال طریقے سے ادا کیا اور گویا اپنی زندگی کا ہر پل اس کے لئے وقف کر دیا وہ ناقابل فراموش ہے۔

بیس مارچ۱۹۷۹ء کو آپ کو دار العلوم کا نائب مہتمم مقرر کر دیا گیا جس پر ۱۹۸۸ء تک برابر کام کرتے رہے۔

آپ کی تعمیری صلاحیتوں کی وجہ سے مسجد شکور خاں کے تعمیری کام بھی آپ کے حوالے کئے گئے حضرت مولانا کے انتقال کے بعد آپ کو مسجد شکور خاں کی کمیٹی کا صدر چنا گیا اور آخر وقت تک آپ اس عہدہ پر فائز رہے۔

سن ۱۹۷۵ء میں جب ندوہ کا ۸۵ سالہ عالمی جشن منعقد ہوا اور حضرت مولانا اس جشن کے انتظامات کے سربراہ ہوئے توان کے معاونین میں مولانا سلمان صاحب پیش پیش رہے۔

رٹائرمنٹ کے بعد آپ اپنے صاحبزادہ مولانا محمد رئیس خاں صاحب ندوی کے گھر پر رہنے لگے ۱۷/مئی ۱۹۹۱ء کو وہاں پر ہی دورۂ قلب کی وجہ سے آپ کی وفات ہوئی۔

اخلاق وکردار میں آپ مجموعۂ فضائل تھے نہایت وضع دار ، متواضع ، مہمان نواز ، فیاض اور ہر شخص کے کام آنے کی ان کی خوبیاں ہمیشہ یاد رکھی جائیں گی۔

مولانا محمد لقمان خاں صاحب ندوی ازہری نائب مہتمم متوفی ۵/جولائی ۲۰۰۲ء

آپ مولانا مرحوم کے سب سے چھوٹے بھائی تھے،۱۹۴۰ء میں بھوپال میں پیدا ہوئے ابھی چھوٹے ہی تھے کہ والد ماجد کا انتقال ہو گیااس لئے آپ کی پوری تعلیم وتربیت مولانا مرحوم کی نگرانی میں ہی ہوئی ، خاندانی روایت کے مطابق آپ نے بھی دار العلوم ندوۃ العلماء میں تعلیم حاصل کی، ۱۹۵۸ء میں عالمیت اور ۱۹۶۰ء میں فضیلت کرنے کے بعد آپ اعلی تعلیم کے لئے مصر چلے گئے جہاں جامعہ ازہر اور قاہرہ یونیورسٹی سے کئیں ڈگریاں حاصل کیں،۱۹۶۳ء میں لیبیا کے شہر البیضاء میں درس وتدریس سے وابستہ ہوئے اور ایک طویل عرصے تک یہ خدمت انجام دی ۱۹۷۶ء میں دار العلوم تاج المساجد کی مجلس شوریٰ کے رکن ہوئے ،۱۹۸۷ء میں جب وطن واپس آئے تو دار العلوم تاج المساجد میں استاد کی حیثیت سے تقرر ہوا ۱۹۸۸ء میں آپ نائب مہتمم ہوئےاور ۱۹۹۷ء تک اسی عہدے پر قائم رہے۔

عربی زبان پر قدرت اور فن تدریس میں مہارت رکھتے تھے، اور خوش مزاجی اور خدمت خلق کے خاندانی جذبہ کی وجہ سے آپ نمایاں تھے ۔

پانچ جولائی ۲۰۰۲ء مسجد شکور خاں میں آپ جمعہ کے دن عین خطبۂ جمعہ دیتے وقت منبر پر اپنے مالک حقیقی سے جا ملے۔

مولانا اطھر حبیب ریحان ندوی حالیہ نائب مہتمم

جناب محمد جاوید میاں صاحب کنجے بھائی ۱۵/جولائی ۲۰۲۳ء

آپ ۱۴ اگست ۱۹۵۹ء کو بھوپال میں پیدا ہوئے، آپ کے والد عبد المجید صاحب عرف کنجے بھائی بھوپال کی مشہور ومعروف شخصیت تھے۔

آپ شروع ہی سے اپنے والد کے کاروبار سے منسلک رہے اور اپنی محنت، لگن ،ایمانداری ،اخلاق اور اعلیٰ ظرفی سے اس میں چار چاند لگا دئیے ، آپ کا شمار نہ صرف بھوپال اور مدھیہ پردیش بلکہ ہندوستان کے بڑے تاجروں میں ہوتا ہے ۔

عنفوان شباب سے ہی دعوت وتبلیغ کی محنت سے جڑے رہےاور بھوپال اجتماع کے نظم ونسق اور انتظامات میں آپ کا کلیدی رول رہتا ہے، ہندوستان کے اکابر ،بزرگوں اور علماء ِ دین سے نیاز مندی کی سعادت حاصل ہے، بہت سارے دینی اداروں اور مساجد کی کمیٹیوں کے ممبر ہیں۔

سن ۲۰۰۰ء میں آپ کو دار العلوم تاج المساجد کی مجلس شوریٰ کا ممبر منتخب کیا گیا، بانیٔ دار العلوم حضرت مولانا محمد عمران خان ندوی ازہری و سابق معتمد تعلیمات مولانا حبیب ریحان خان ندوی ازہری سے آپ کا خصوصی تعلق رہا ، دار العلوم تاج المساجد کے سابق امیر حضرت مولانا محمد سعید میاں مجددی وحافظ محمد سراج الحسن صاحب مجددی کے آپ معتمد خاص رہے، ۲۰۱۷ء میں آپ کو دار العلوم تاج المساجد کا مہتمم انتظامیہ مقرر کیا گیا آپ دار العلوم تاج المساجد کی تعمیر وتحسین نیز اوقاف تاج المساجد کے نظم ونسق اور دار العلوم کے ذرائع آمدنی بڑھانے کے کاموں میں جی جان سے مصروفِ عمل ہیں۔

(ابتداء تا حال) ممبران

مجلس شوریٰ دار العلوم تاج المساجد، بھوپال